Русија испраќа илјадници неодамна мобилизирани војници за да ја засили одбраната на јужниот регион Керсон, каде што украинските сили напредуваа во нивната офанзива за враќање на територијата окупирана од Москва, соопшти денеска украинската војска. „Околу 2.000 мобилизирани Руси пристигнаа во привремено заземениот регион Керсон за да ги надополнат загубите и да ги зајакнат единиците“, се вели во соопштението на Генералштабот на украинските вооружени сили. Украина се обидува да ги потисне руските сили во Керсон на исток преку реката Дњепар што ја преполовува земјата.
Руските војници на западниот брег, каде што се наоѓа градот Керсон, наводно се блиску до отсекување од линиите за снабдување и засилување. Кабинетот на претседателот Володимир Зеленски вчера соопшти дека украинските сили извршиле 15 напади врз руските воени упоришта во регионот Керсон, што се чини дека е почеток на голем притисок за ослободување на регионот. Градот Керсон, со предвоено население од околу 284.000 луѓе беше еден од првите урбани области што ги зазеде Русија кога ја нападна Украина и останува најголемиот град што го има под контрола.
