Досегашните истражувања покажуваат дека лекот Паксловид го намалува ризикот да се заврши во болница и смртните случаи кај пациентите со Ковид-19 за 89%, соопшти американската фармацевтска компанија Фајзер денеска во Њујорк. Ваков заклучок се изведува за лицата кај кои лекот бил даван во рок од три дена по појавата на првите симптоми на Ковид-19. Слични резултати имало и кај третманите кои почнале во рок од пет дена.
Фајзер оценува дека станува збор за „огромна ефикасност“ на лекот. Според актуелните истражувања, апчето на Фајзер (ефикасност од 89%) е поефикасно од Молнупиравирот на компанијата Мерк, кој во слични тестови покажал намалување на ризикот од 50%. Сега Фајзер планира да ги достави овие податоци што е можно поскоро до Американската агенција за лекови ФДА.
Антивирусниот лек, кој се зема орално, во случај ја добие дозвола, има потенцијал „да спасува животи на пациенти, да ја намалува тежината на заболувањето и да спречува девет од десет престои во болница“, се вели од Фајзер.
Британската агенција за лекови МХРА вчера првпат даде дозвола за апче против Ковид-19. Антивирусниот лек Лагеврио (познат и под името Молнупиравир) е сигурен и ефикасен за намалување на ризикот од завршување во болница и смртни случаи кај пацинетите со Ковид-19 кои имаат умерен и средно тежок тек на болеста, се вели во соопштение на британската влада. Лагеврио е прво во светот антивирусно средство против Ковид-19 кое има добиено дозвола, а се зема орално. Европската агенција за лекови ЕМА на крајот на октомври најави дека ќе ја проверува употребата на Молнупиравир. ЕМА врши проверка и на седум други средства против корона.
Лекот Паксловид, кој припаѓа кон протеазните инхибитори, блокира ензим кој на коронавирусот му е неопходен за размножување, додека Молнупиравирот има поинаков механизам на дејствување и цели кон тоа да вовлече грешки во генетскиот код на вирусот.
