Германскиот Бундестаг во петокот усвои широка реформа со која значително се прошируваат овластувањата на разузнавачките служби во борбата против шпионажата, тероризмот и саботажите.
Реформата беше поддржана од 309 пратеници, 190 гласаа против, а 71 беа воздржани.
Новата регулатива ги утврдува надлежностите и ограничувањата за работата на Сојузната разузнавачка служба (БНД), задолжена за надворешното разузнавање, и Сојузната служба за заштита на уставниот поредок (БфВ), која се занимава со внатрешната безбедност.
Меѓу новите овластувања е можноста службите да користат алатки за следење на телекомуникациите, како и за споредување биометриски податоци. Со реформата, БфВ добива и право, под одредени услови, тајно да влегува во станови во потрага по оружје и експлозиви.
Досега оваа служба главно беше ограничена на собирање информации и следење лица, но со новите законски решенија нејзините оперативни можности се прошируваат. Сепак, апсењата и претресите со знаење на засегнатите лица и натаму остануваат исклучиво во надлежност на полицијата.
Поголеми овластувања добива и БНД, која отсега ќе може да презема оперативни интервенции во странство. Како пример се наведува можноста за онеспособување сервери што ги користат хакерски групи кои дејствуваат под покровителство на одредени држави.
За примена на дел од новите мерки, разузнавачките служби претходно ќе мора да добијат одобрение од посебна комисија составена од поранешни судии.
Германската влада ја покрена реформата поради зголемените закани од странски разузнавачки служби, пред сè од Русија, Кина и Иран. Една од целите е и намалување на зависноста на Германија од разузнавачките информации што ги добива од сојузничките и партнерските земји.
Со реформата, германските власти настојуваат да им овозможат на безбедносните служби поефикасно да одговорат на современите безбедносни закани, но и да воспостават механизми за контрола на новите овластувања.
