Европа ќе настапи со заеднички дипломатски тим на следната рунда преговори за завршување на војната во Украина, во обид да не биде исклучена од процесот што го предводат САД. Ова го потврди претседателот на Европскиот совет, Антонио Кошта, по самитот во Даблин.
Тимот ќе го сочинуваат претставници на институциите на Европската Унија и пет држави од таканаречената „Коалиција на подготвените“ – Велика Британија, Франција, Германија, Италија и Полска.
„Мораме да дејствуваме заедно. Затоа е неопходно да имаме тим и да настапуваме со еден глас“, изјави Кошта.
Европските лидери се загрижени дека преговорите предводени од Вашингтон би можеле да се одвиваат без нивно учество, со што Украина би била ставена во понеповолна позиција, додека САД и Русија разговараат за иднината на конфликтот.
Според АП, европските земји сакаат да имаат место на преговарачката маса, но претходно имаше несогласувања околу тоа дали Европа треба да ја претставува еден специјален пратеник или поширок дипломатски тим.
Италијанската премиерка Џорџа Мелони е меѓу поддржувачите на идејата за еден заеднички европски претставник, со образложение дека недостигот од единствен глас им овозможувал на одделни држави да водат сопствена дипломатија.
Засега не е соопштено кој конкретно ќе ги претставува институциите на ЕУ во тимот. Во јавноста претходно се споменуваа имињата на Кошта и високата претставничка на Унијата за надворешна политика, Каја Калас.
