За прв пат во историјата, израелските научници создадоа синтетички ембриони без употреба на јајце клетки и сперматозоиди, наместо користејќи исклучиво матични клетки земени од кожата на глувците.
Во многу сложениот експеримент кој претставува големо научно достигнување, чии резултати беа објавени во списанието Cell, матичните клетки формираа ембрион со цревниот систем, мозок, па дури и срцето што чука.
Според биологот Јаков Хана од научниот институт „Вајсман“, резултатите од експериментот се неверојатни.
„Немаше сперма, јајце клетки и матка, но успеавме да формираме ембриони исклучиво од матични клетки за осум дена – третиот гестациски период кај глувците – со срце што чука“, изјави Хана за Тајмс оф Израел.
Тој додаде дека ова е првпат толку напреден ембрион да се одгледува само од матични клетки.
Хана за весникот објаснила дека ова достигнување може да го отвори патот за одгледување вештачки ембриони кои ќе се користат во медицината за одгледување органи за трансплантација.
„Ембрионот е најдобрата машина за правење органи и најдобриот 3Д биопринтер. Се обидовме да го имитираме тоа“, истакна Хана.
Обиколен пат околу етичките прашања
Користењето на човечки ембриони како извор на матични клетки за одгледување органи за трансплантација предизвика мешани етички реакции, но израелскиот тим верува дека новото истражување нуди потенцијален решение бидејќи синтетичките ембриони се многу слични на природните, но не можат да се трансплантираат.
Израелските експерти успеале да го одгледуваат ембрионот со помош на специјален систем за инкубација. Секој ембрион лежи во сад исполнет со течност што се ротира за да не се залепи на едната страна.
Инкубаторот ги обезбедува сите потребни услови за развој, вклучувајќи го и идеалниот сооднос на гасови, притисок и температура, додека течноста што го содржи ембрионот служи како хранлив раствор.
Најновиот експеримент е продолжение на постигнатите успеси. Тимот на Хана претходно разви метод за репрограмирање на матичните клетки во нивните најрани фази на развој кога тие имаат најголем потенцијал да преземат различни улоги, т.е. да формираат какво било ткиво.
Тие, исто така, развија уред кој им овозможи да растат природни ембриони од глушец надвор од матката.
