Почнувајќи од денесka, светските лидери ќе се обратат на Генералната дебата на 77-та сесија на Генералното собрание на ОН во време кога светот е зафатен од климатски катастрофи, несигурност со храна, војни и ОН кои минуваат низ длабоки поделби. Во текот на една недела, околу 150 шефови на влади и држави од целиот свет треба да се обратат на големиот годишен дипломатски собир, кој се одржува во живо по две години поради пандемијата со ковид-19. Традиционално, на првиот ден од Дебатата прв говори претставникот на Бразил, а потоа американскиот претседател, шефот на државата каде што е седиштето на ОН. Меѓутоа, по исклучок оваа година, како што беше случај во многу ретки случаи во минатото, претседателот Џо Бајден, кој вчера присуствуваше на погребот на британската кралица Елизабета Втора, го премести обраќањето за утре.
