Папата Лав XIV ја осуди страдањата и понижувањата на африканските робови за време на посетата на Зања, на северот на Перу, и изрази солидарност со нивните потомци.
Обраќајќи им се на припадниците на афроперуанската заедница, папата рече дека Зања, која се наоѓа во бискупијата Чиклајо, ги чува сеќавањата на генерациите Африканци кои насилно биле одведени од своите домови и продадени како робови.
„Многумина претрпеле големи страдања и понижувања. Драги браќа и сестри со африканско потекло, денес сакам да ви ја изразам својата наклонетост и поддршка“, порача папата.
Зања е место кое УНЕСКО го прогласи за меморијален локалитет посветен на историјата на ропството и денес е едно од средиштата на афроперуанската заедница.
Лав XIV, првиот папа роден во САД, во својата семејна историја има и робови и робовладетели. Во својата прва енциклика „Величествена човечност“, тој упати сеопфатно извинување за улогата на претходните папи во легитимирањето на ропството во Америка, како и за тоа што со векови не го осудувале.
Се проценува дека околу 100.000 африкански робови биле донесени во Перу по пристигнувањето на шпанските освојувачи. Тие работеле на плантажи со шеќерна трска и во рудници за сребро, а дел од нив станале занаетчии во градовите.
Во одреден период африканските робови и нивните потомци сочинувале повеќе од 40 проценти од населението на Лима. Денес, луѓето со африканско потекло се мал дел од вкупно околу 35 милиони жители на Перу.
Папата Лав XIV ја започна својата дванаесетдневна турнеја низ Јужна Америка на 6 ноември, при што претходно ги посети Уругвај и Аргентина. Во Перу, чиј државјанин е и каде со години служел како мисионер и бискуп, пристигна на 11 ноември. Посетата треба да ја заврши на 17 ноември.
