Антивоени демонстрации беа одржани во многу европски метрополи, каде знаменитостите беа осветлени во боите на украинското знаме на 24 февруари кога светот ја одбележа годишнината од тековната целосна инвазија на Русија врз Украина, објави РСЕ.
Ајфеловата кула во Париз, Колосеумот во Рим и Националниот театар во Варшава беа меѓу европските споменици осветлени во сина и жолта боја. Во Берлин, активистите поставија уништен руски тенк пред руската амбасада, а толпата набљудуваше со едноминутен молк на Плоштадот на слободата во Талин, каде претседателката на Европската комисија Урсула фон дер Лајен и генералниот секретар на НАТО Јенс Столтенберг се приклучија на церемонијата за загинатите.
Британскиот премиер Риши Сунак, исто така, одбележа едноминутен молк пред Даунинг стрит, додека двајца пејачи облечени во традиционални украински кошули ја пееја украинската химна.
Неколку протести беа одржани и во Ереван за поддршка на Украина. Група Украинци, Руси и Ерменци се собраа пред статуата на украинскиот писател Тарас Шевченко во знак на протест против војната. Уште една демонстрација беше организирана во близина на руската амбасада во Ереван.
Во Белград, околу 20 активисти се упатија кон руската амбасада, но беа спречени од полицијата да донесат торта во облик на череп за која велат дека го илустрирале резултатот на руската политика и окупацијата на Украина.
Дополнително, тие донесоа писмо адресирано до рускиот претседател Владимир Путин во кое бара негово предавање на меѓународниот суд кој ги истражува воените злосторства извршени во Украина.
Повеќе од 1.000 луѓе учествуваа и на антивоениот марш во центарот на Белград организиран од Украинската амбасада. Учесниците вееја украински знамиња и знамиња на САД, Германија, Данска и други земји кои ја поддржуваат Украина додека извикуваа „Слава на Украина“, „Да живее Србија“ и „Смрт на фашизмот“.
Украинскиот амбасадор во Србија, Володимир Толкач, рече дека Украина се обидува да го врати мирот и да ги казни одговорните за злосторствата. Тој и се заблагодари на Србија за „зголемената поддршка“ за Украина.
На маршот учествуваа и евроамбасадорот Емануел Џауфрет и заменик-амбасадорот на САД Џон Гинкел. Гинкел рече дека Србија ја покажала својата поддршка, наведувајќи ја нејзината помош во хуманитарните напори за луѓето во Украина.
Долго украинско знаме беше распослано на главниот плоштад на Републиката додека луѓето положуваа цвеќе во спомен на жртвите од војната пред украинската амбасада.
Во Женева се одржа мрачна церемонија пред канцеларијата на Обединетите нации, каде што амбасадорите на земјите кои ја поддржуваат Украина одржаа едноминутен молк.
Претставниците на Франција, Канада и Британија ја прегрнаа својата украинска колешка Јевхенија Филипенко, која носеше традиционална украинска кошула под јакната.
„Важно е Украинците да знаат дека светот се сеќава на нив, дека светот ќе зборува за злосторствата на Русите, за воените злосторства на Русите и за злосторствата против човештвото извршени во Украина“, им рече Филипенко на новинарите.
Жером Бонафон, францускиот амбасадор во ОН во Женева, рече дека годишнината е можност да се истакне неверојатниот отпор на украинскиот народ.
„Тука сме да го одбележиме трагичниот ден, почетокот на инвазиите врз Украина од страна на Русија, но и денот кога започна отпорот на кој сите се восхитуваме“, рече тој.
М. П.
