Американскиот претседател Џозеф Бајден денеска потврди дека Израел се согласил да дозволи проток на хуманитарна помош од Египет во Газа, со тоа што таа помош ќе биде предмет на инспекции и ќе биде за цивили, а не борците на Хамас.
Во обраќањето од Тел Авив тој ја предупреди земјата „да не дозволи нејзиниот гнев целосно да ја проголта“.
Израел ги прекина сите достави на храна, гориво и вода во Газа по терористичкиот напад на Хамас пред 12 дена. Медијаторите се обидуваат во малата густо населена палестинска област, која сега е под израелска опсада, да влезе помош која им е итно потребна на цивилите, болниците и хуманитарните организации.
Бајден рече дека разговарал со израелската влада за да се „согласи да се испорача хуманитарна помош во Газа, наменета за спасување на животите на цивилите“.
– Да бидам јасен, ако Хамас ја пренасочи или украде оваа помош, тој уште еднаш ќе покаже дека не води сметка за благосостојбата на палестинскиот народ, нагласи американскиот претседател.
Појасот Газа е под политичка управа на Хамас.
Бајден, исто така, рече дека дополнителни 100 милиони долари хуманитарна помош ќе бидат обезбедени за Газа и Западниот Брег.
