На првата седница на новиот законодавен дом на Собранието на Србија се расправа за преговарачкиот процес меѓу Косово и Србија за нормализација на односите. Српскиот претседател Александар Вучиќ изјави дека Србија ниту директно ниту индиректно нема да го признае Косово.
„Сè додека имам влијание, Србија ниту директно, ниту индиректно нема да ја признае едностраната независност на Косово. Нема да се откажам од мојата легитимна борба за државните и националните интереси, како и за почитување на меѓународното право. САД го признаваат државјанството на Косово и секогаш ќе стојат зад Албанците. Не постои политика што може да го промени ова“, рече Вучиќ.
На говорот на Вучиќ прв реагираше единствениот албански пратеник во српското Собрание Шаип Камбери. Тој порача дека Косово е независна држава и дека властите во Србија мора да им ја покажат реалноста на граѓаните.
„Косово е независно од Србија и што сакате да постигнете таму, треба да го постигнете во договор со локалните власти. Србија нема влијание кој ќе биде таму на власт. Србите во Република Косово имаат бројни права загарантирани со Уставот во парламентарното претставување и извршната власт, додека Албанците и другите малцинства во Србија немаат“, рече Камбери.
Седницата за Косово ја побараа одредени опозициски групи во Собранието на Србија – кои бараат преговорите да одат во Советот за безбедност на Обединетите нации, додека Уставниот суд да ја оценува законитоста на сите потпишани договори во рамките на бриселскиот дијалог.
Шкелзен Аќифи
