Првиот заменик претседател, министерот за животна средина и просторно планирање Изет Меџити, денеска од општина Липково ја започна акцијата на садење на дрвца, како дел од проектот за пошумување на деградирано земјиште на екстремно неповолни терени, со вкупна површина од околу 400 хектари во целата држава.
Меџити по садењето на првото дрвце, изјави пред медиумите дека целта на акцијата е обновување на шумскиот фонд, заштитување на почвата од ерозија во близина на еден важен капитален стратешки објект, како што е Липковското Езеро, преку кој се обезбедува водоснабдување на оваа општина.
„Активноста се спроведува во рамки на проектот кој е финансиски поддржан од Глобалниот еколошки фонд ГЕФ 6, со вкупна вредност од 500 илјади долари, а се спроведува од Министерството за животна средина и просторно планирање со поддршка од Програмата на Обединетите Нации за животна средина -УНЕП“ изјави Меџити.
Информира дека ќе се засадат 800 илјади садници, во наредните 2 години, заедно со Јавното претпријатие ,,Национални Шуми” на пет локации во државата, во околината на Липковско Езеро, село Страчинци, Свети Николе, Демир Капија и Гевгелија.
Акцијата на засадување се реализира по повод 5 Декември, Светскиот ден на почвата, со цел пошумување на деградирано земјиште на екстремно неповолни терени.
Меџити најави дека во тек е подготовката на Законот за заштита на почвата во Северна Македонија, а како следен чекор е отпочнување со подготовка на Стратегија за заштита на почвата, која ќе вклучува насоки за воспоставување програма за следење на квалитетот на почвата.
Денешната активност се спроведува во рамки на проектот кој е финансиски поддржан од Глобалниот еколошки фонд ГЕФ 6, со вкупна вредност од 500 илјади долари, а се спроведа од Министерството за животна средина и просторно планирање со поддршка од Програмата на Обединетите Нации за животна средина (УНЕП).
