Француската премиерка Елизабет Борн денеска им оддаде почит на жртвите од нападите на 13 ноември 2015 година, со едноминутно молчење на местата на нападите во Париз – Сен Дени, Стад де Франс, терасите на Каријон и Петит Камбоџ, Ла Бон Биер, Кочптоар Волтер, Бел Екип и концертната сала Батаклан.
Advertisements
На церемонија се прочитаа имињата на убиените и се одржа минута молк во знак на почит на 130 загинати и повеќе од 350 повредени во најтешките терористички напади во историјата на Франција, за кои одговорноста ја презеде организацијата Исламска држава (ИД), јави дописникот на МИА од Париз.
Историското судење за овие напади заврши на 29 јуни, по десет месеци рочишта. Специјалниот универзален суд во Париз го осуди Салах Абдеслам, единствениот преживеан член на командосите, на доживотен затвор, најтешката казна во кривичниот законик. Неговите 19 сообвинети (од кои за шестмина се претпоставува дека се мртви, им се судеше во нивно отсуство) беа осудени на казни од две години до доживотен затвор.
Елизабет Борн беше во придружба на градоначалничката на Париз Ан Идалго и претседателите на здруженијата на жртвите „Животот за Париз”, Артур Денуво и „13онзе15″, Филип Дуперон.
„Денеска мислам на сите жртви на нападите (…). На сите тие скршени животи. На сите оние кои живеат секој ден без саканата личност. На сите преживеани. Времето не го брише ниту сеќавањето ниту болката”, напиша Франсоа Оланд на Твитер, кој беше шеф на државата за време на овие напади.
