Американскиот претседател Џо Бајден има два сина. За жал, тој остана без постариот Бо кој пред неколку години почина од тумор на мозокот, додека помладиот, Хантер секогаш му создавал проблеми.
Во пресрет на објавувањето на неговите мемоари „Beautiful Thing“, синот на американскиот претседател Џо Бајден, проблематичниот Хантер откри некои детали од неговиот приватен живот и уште еднаш ја разбранува јавноста.
„Купив крек на улиците во Вашингтон и го земав во мојата соба во хотел во Лос Анџелес… Тоа беа денови кога бев толку очаен за пијалок што не можев да издржам да стигнам дома за да го отворам шишето од продавницата за алкохол што е на само еден блок оддалечена од мојот стан“, пишува 51-годишниот Бајден во своите мемоари.
Помладиот син на Џо Бајден никогаш не ја криел својата зависност, и често беше вклучен во бројни скандали во минатото, кои повторно ескалираа за време на претседателската кампања на неговиот татко, вклучувајќи ја и неговата љубовна врска со неговата снаа, сопругата на неговиот покоен брат Бо, но и деловни односи со украинската компанија „Бурисима“.
„Само во последните пет години, мојот дводецениски брак се распадна, честопати имав вперен пиштол во глава, а во еден момент паднав толку ниско што живеев во мотел на автопат“, напиша Хантер Бајден, откривајќи дека во еден момент од животот дозволил бездомник и зависник, од кого купувал дрога, да се пресели да живее кај него.
„Нашата врска беше симболична – ние бевме двајца зависници од крек кои не знаеја како да се извлечат од сето тоа“, откри Бајден, воедно опишувајќи го моментот кога, додека очајно барал дрога, му впериле пиштол во главата.
„Поминував покрај луѓе кои спиеја на тенки парчиња картон. Над нив забележав неосветлен шатор. Беше темно темно, и сè што видов беше пиштол вперен во моето лице“, вели Бајден.
Комбинацијата на алкохол и дрога, за среќа, не била фатална во неговиот случај, но сепак, сето тоа се одразило на неговиот изглед и во тоа време, изгубил 20 килограми. Тој кошмар го преживувал додека неговиот татко беше потпретседател на САД кој воедно бил свесен дека неговиот син не е добро и му треба помош.
„Никогаш не ми дозволи да се чувствувам изгубено. Никогаш не ме напушти, не се одрече од мене, никогаш не ме осуди без оглед колку и да беше лоша ситуацијата… Тој веруваше во мене и ми помогна да не потонам уште подлабоко“, призна во своите мемоари, додавајќи дека сето тоа се случило наеднаш кога неговиот постар брат Бо Бајден, почина во 2015 година од тумор на мозокот.
Иако бил близок со својот брат, по неговата смрт тој дури започнал врска со неговата вдовица Хали.
„Нашата врска започна во очаен обид да најдеме утеха по љубовта што двајцата ја изгубивме, но тоа само ја продлабочи трагедијата. На крај, ни стана јасно дека не можеме да го вратиме она што недостасуваше“, вели Хантер.
Своите мемоари ги завршува опишувајќи го неговиот живот денес – чист од опијати и алкохол. Хантер Бајден моментално живее во Калифорнија со својата втора сопруга Мелиса Коен Бајден и нивниот мал син Бо, именуван по неговиот никогаш непреболен брат. Покрај него, Хантер Бајден има уште три ќерки.
