Почетокот на патничкиот железнички сообраќај на брзата пруга што ги поврзува Будимпешта и Белград повторно се одложува, а засега нема нов датум кога возовите ќе почнат да превезуваат патници. Причината се софтверски проблеми во системот за управување со возовите, кои сè уште ги отстранува кинескиот изведувач на работите.
Ова го соопшти унгарскиот министер за сообраќај и инвестиции Давид Витези, кој посочи дека во изминатите неколку недели на пругата биле спроведени обемни тестирања, какви што досега не биле забележани во историјата на унгарските железници.
Станува збор за прва железничка линија во Унгарија на која кинески производител вградува безбедносни системи усогласени со европските стандарди. Поради тоа, пред почетокот на патничкиот сообраќај, потребни се дополнителни проверки за да се потврди дека сите системи функционираат правилно.
Во тестирањата, покрај унгарските железници, е вклучена и независната организација за контрола на квалитетот ТУВ, на иницијатива на поранешниот министер Јанош Лазар.
Витези нагласи дека возовите нема да превезуваат патници сè додека надлежните институции и сертификациските тела не потврдат дека безбедносните системи се целосно исправни и дека нема пропусти што би можеле да ја загрозат безбедноста.
Досегашните проверки откриле помали софтверски проблеми, поради што тестирањата ќе мора да се повторат и по најмалите измени во системот. Потребните дозволи ќе бидат издадени дури откако успешно ќе завршат сите проверки.
Унгарскиот министер потврди и дека патничкиот сообраќај нема да биде воспоставен ниту со новиот железнички возен ред, кој стапува во сила на 13 декември. Ова е спротивно на претходните најави на српските и австриските железници, кои очекуваа возовите да почнат да сообраќаат врз основа на информациите од унгарската железница за успешно завршените претходни тестирања.
Витези порача дека безбедноста на патниците останува приоритет и дека со одложувањето се покажува сериозниот пристап на надлежните институции кон проверката на системите.
