Израелскиот премиер, Бенјамин Нетанјаху, им честиташе на Милорад Додик и на неговата Сојуз на независни социјалдемократи (СНСД) за победата на општите избори одржани во неделата во Босна и Херцеговина. Тој ги опиша Додик и неговите партиски колеги како големи пријатели и најави понатамошно зајакнување на соработката со Република Српска.

„Сакам да им честитам на моите големи пријатели – претседателот Милорад Додик, претседателката Жељка Цвијановиќ, претседателот Саво Миниќ и СНСД – за нивната убедлива изборна победа во Република Српска оваа недела“, напиша Нетанјаху на социјалната мрежа X.

„Со нетрпение очекувам години на блиска соработка и проширување и продлабочување на соработката меѓу нашите народи во областите на технологијата, енергетиката, безбедноста и други сфери“, додаде израелскиот премиер.

На општите избори одржани на 4 октомври, СНСД постигна значителен успех во Република Српска, според прелиминарните резултати на Централната изборна комисија (ЦИК) на БиХ. Жељка Цвијановиќ, кандидатката на СНСД за српски член на тричленото Претседателство на БиХ, освои втор мандат, додека Саво Миниќ – кандидатот на истата партија за претседател на Република Српска – водеше пред опозицискиот кандидат на СДС, Бранко Блануша, според прелиминарните резултати.

Додик, кој претходно ја загуби функцијата претседател на Република Српска, остана на чело на СНСД и ја прогласи победата на својата партија по изборите.

Во последните години, Додик одржува блиски врски со политичкото раководство на Израел. Тој во неколку наврати го посетил Израел, при што се сретнал со Нетанјаху и со израелскиот претседател Исак Херцог. Властите на Република Српска настојуваат да ја прошират соработката со Израел, особено во областите на технологијата, економијата, земјоделството и безбедноста.

Текстот Нетанјаху: Честитки до мојот голем пријател Милорад Додик е превземен од МАКФАКС.

ПОВРЗАНИ НАПИСИПОВЕЌЕ ОД АВТОРОТ