Русија денес ги предупреди жителите на Киев, вклучувајќи го дипломатскиот персонал и претставниците на меѓународните организации, да го напуштат украинскиот главен град „што е можно поскоро“ и да ги избегнуваат воените и административните објекти.
Руското Министерство за надворешни работи објави на Телеграм дека Русија ќе изврши „систематски напади“ врз објекти поврзани со воено-индустрискиот комплекс на Украина во Киев по она што го опиша како „крвав напад“ врз зградата на колеџот и студентскиот дом во рускиот окупиран дел од Луганската област, во кој беа убиени 21 студент.
„Сето ова ја достигна точката на пресврт“, соопшти руското министерство.
Москва тврди дека целите ќе бидат локации каде што украинските беспилотни летала се дизајнираат, произведуваат и подготвуваат „со помош на експерти од НАТО“.
„Нападите ќе бидат насочени и кон центрите за донесување одлуки и командните места“, се вели во соопштението.
Украинскиот претседател Володимир Зеленски претходно изјави дека четири лица се убиени, а околу 100 повредени во руските ноќни напади, за кои Москва рече дека биле одговор на украинскиот напад врз универзитетската зграда во Старобилск.
Руските власти соопштија дека бројот на жртви во нападот се искачил на 21 откако операцијата за пребарување и спасување заврши во неделата.
Украина ги отфрла обвинувањата
Украина ги отфрли руските обвинувања и рече дека нејзините сили се насочени само кон воена инфраструктура и објекти што служат за воени цели, во „строго почитување на меѓународното хуманитарно право и правилата на војување“.
Фото: ЕПА
Текстот Русија со предупредување до жителите на Киев: Напуштете го градот што е можно поскоро е превземен од МАКФАКС.
