Иранските државни медиуми најостро ги демантираат изјавите на американскиот претседател Доналд Трамп дека е успешно спасен и вториот член на екипажот на соборениот борбен авион Ф-15, пренесува Си-Ен-Ен. Додека Вашингтон прогласува успешна мисија, Техеран изнесува сосема поинаква верзија за настаните во јужниот дел на земјата.

Трамп: Херојска акција со најмоќно оружје
Американскиот претседател претходно објави дека пилотот е извлечен во огромна операција во која учествувале десетици авиони вооружени со „најмоќното оружје“. Трамп потврди дека пилотот е повреден, но дека неговата состојба е стабилна и дека ќе биде добро. Според американски извори, двајцата членови на екипажот биле спасени во две одвоени операции на специјалните сили длабоко на иранска територија.

Иран: Операцијата на САД пропадна
Од друга страна, иранската новинска агенција Тасним, повикувајќи се на воениот врх, тврди дека спасувачката мисија претрпела неуспех. Според нивните наводи, иранските сили уништиле повеќе американски летала во јужната покраина Исфахан. „Повеќе непријателски американски авиони беа уништени од страна на воините на исламот, а операцијата за спасување не успеа“, објави Тасним.

Иранските власти тврдат дека биле погодени и запалени два хеликоптери Блек Хок и еден воен транспортен авион Ц-130. Како доказ за овие тврдења, иранските медиуми објавија снимки на кои наводно се гледаат остатоци од уништените летала.

Уништени летала за да не паднат во заробеништво
Сепак, постојат извештаи кои нудат поинакво објаснување за уништените летала. Би-Би-Си објави дека американските сили биле принудени самите да уништат два свои транспортни авиони од типот ХЦ-130Ј Комбат Кинг 2, кои од непознати причини не можеле да полетаат по евакуацијата. Целта била да се спречи напредната воена технологија да падне во рацете на иранската војска.

Остри пораки од Техеран
Претседателот на иранскиот парламент, Мохамад Багер Галибаф, ги исмеа тврдењата на САД. Споделувајќи фотографија од урнатините, тој упати провокативна порака: „Ако Соединетите Американски Држави остварат уште три вакви ‘победи’, ќе бидат целосно уништени“.

Агенцијата Тасним исто така го обвини Трамп дека се обидува да го прикрие тешкиот пораз преку ширење лажни информации за успехот на специјалните единици.

Текстот Иран: Не, Американците не го спасија пилотот на соборениот Ф-15 е превземен од МАКФАКС.

ПОВРЗАНИ НАПИСИПОВЕЌЕ ОД АВТОРОТ