Иднината на превозот веројатно ни носи и летачки такси во секојдневниот транспорт. Многу компании развиваат и тестираат вакви летала. Меѓу нив има и стартапи, но и гиганти како Airbus и Boeing. Според некои најави, првите летачки такси кои ќе превезуваат патници може да полетаат веќе за неколку години , но јасно е дека секогаш постои можност за некакво одложување поради технологијата или регулаторните правила.
Досега претежно слушавме за американски и кинески компании кои ја развиваат оваа технологија, но на овој паар активни се и Европејците. Така, од германската компанија Lilium се пофалија дека од агенцијата за безбедност на воздушниот превоз во Европската унија добија регулаторна дозвола за дизајн и производство на воздушно такси кое може вертикално да полета и слета.
Оваа дозвола им овозможува да можат да почнат со следната фаза на дизајнот и производството на леталото, објаснија од компанијата. Поедноставно кажано, ова одобрение е лиценца за работа и потврдува дека Lilium ја има потребната организација, процедура, компетенции и ресурси кои се потребни за дизајн и сертифицирање на авионот според највисоките безбедносни стандарди.
Леталото кое го развива компанијата, а кое во иднина треба да превезува патнции, ќе користи повеќе мали пропелери на погон на електричен мотор, кои ќе овозможат вертикално полетување и слетување, како и потисок во текот на летот. Со едно полнење ова летало би требало да издржи околу 300 км лет. со таков досег јасно е дека Lilium нема намера да ги замени класичните авиони, ниту размислуваат за летови меѓу држави, туку нивните такси треба да поврзуваат градови и места кои не се преногу оддалечени.
Со оглед на тоа дека може да полетаат и да слетаат вертикално, како хеликоптер, на таквите летала не им треба класична поста, туку релативно мал простор за маневрирање. Исто така, бидејќи работи на електричен погон, не создава толку бучава.
(CNBC)
