Навивачките групи Лавови Ѓорче и Дивизија Ханриево Младина организираат новогодишна хуманитарна акција за собирање на новогодишни пакетчиња, облека и мебел. Од каде се појавила желбата за организирање на ваков хуманитарен настан денеска во Утрински брифинг зборуваше еден од организаторите на акцијата, Стефан Копчаревски.
-Идејата е моја, јас сум вработен во Завод за рехабилитација и говор на деца во Клиничкиот центар и кога гледам како се радуваат дечињата на пакетчињата кои ги добиваа, одлучив да направам акција во која ќе се соберат многу пакетчиња за да израдуваме што повеќе деца пред новогодишните празници. Имаме голема поддршка од Управата на клубот Македонија Ѓорче Петров, од Општината но и од многу поединци, рече организаторот Копчаревски. Акцијата започна на 26.12.2020 кога во текот на цел ден граѓаните имаа можност донациите да ги оставаат на влезот на стадионот на Фудбалскиот клуб „Македонија Ѓорче Петров“.
-Позитивно бев изненаден колку луѓе дојдоа и донираа во саботата, кога всушност започна хуманитарната акција. Најмногу се донираа пакетчиња, досега собравме околу 200 пакетчиња, но се донираа и пари, облека и мебел. Донациите ќе ги намениме за социјално загрозени семејства. Денеска очекуваме од Општината да добиеме список за да знаеме на кого треба да му донираме, а донациите ќе бидат поделени во текот на неделата, вели Стефан.
Акцијата ќе трае до 30 декември 2020. Секој ден од 10 до 17 часот на штанд кој е поставен во рамки на паркингот на стадионот заинтересираните хумани граѓани ќе имаат можност да донираат.
-Апелирам во акцијата да се вклучат и компаниите. Досега донираше само една компанија, Митковски ММ, но би било добро да има поголем интерес и од останатите. Идејата е пакетчиња да се делат на децата од Ѓорче, но бидејќи има голем интерес, доколку се соберат поголем број пакетчиња, ќе израдуваме деца и од други населби.
