Земјотрес со сила од 6,8 степени според Рихтеровата скала денеска ја погоди планинската област во западниот дел на кинеската провинција Сечуан, соопшти Кинескиот центар за земјотреси. Епицентарот се наоѓал во градот Лудинг на длабочина од 16 километри на околу 180 километри југозападно од главниот град на Сечуан, Ченгду. Жителите од далечните Чангша и Ксиан рекоа дека го почувствувале земјотресот во Сечуан.
Неколку минути подоцна, според центарот, втор земјотрес со сила од 4,2 го погоди градот Јаан во близина на Лудинг. Засега нема информации за жртви. Во 2013 година, Јаан беше погоден од силен земјотрес, при што загинаа повеќе од 100 луѓе, а илјадници беа повредени.
