Во најголем број случаи, главниот проблем што го создаваат акните е од психолошка природа, а се одразува на намалена самодоверба и депресија.
Едни од најчестите кожни болести се акните. Се појавуваат кај двата пола, а можат да се појават на која било воздраст, но најчесто ги напаѓаат адолесцентите, за кои претставуваат не само здравствен, туку и естетски проблем.
Појавата на акни е толку честа што зафаќа 85 отсто од младата популација. Почетокот на појавувањето на акните може да биде од 10 до 17 години кај девојчињата и од 14 до 19-годишна возраст кај момчињата, но не е исклучено да се појават и кај бебињата и повозрасните луѓе.
Акните се хронична воспалителна болест на пилосебацеалната структура на кожата (влакнен фоликул и лојна жлезда).
Фактори за појава на акни се:
- Мултифакторијална генетската предиспозиција
- Хормонален дисбаланс на (половите хормони)
- Присуството на бактерии во лојната жлезда
Сите горенаведени фактори на крај водат до воспалителен процес на кожата кој резултира со појава на акни.
Најчеста локализација се челото, образите, носот, брадата, а може да се појават на вратот, рамената и на градната регија.
Форма на акните според тежина
- Слаба форма
- Умерено тешка или средна
- Тешка форма на акни
Проблемот со акните, особено во пубертетот, може да доведе до психичко оптоварување поради нарушен естетски изглед и повлекување во себе, асоцијално однесување и депресија. Во најголем број случаи, главниот проблем што го создаваат акните е од психолошка природа, а се одразува на намалена самодоверба и депресија. Акните обично се појавуваат во текот на пубертетот, кога младите луѓе и инаку се склони на несигурност.
Поради тоа, младите бараат начин сами да го решат проблемот и често се случува своеволно да се лекуваат, па не е реткост заедно со своите родители да бараат помош и да талкаат долг временски период и по препорака на нестручни лица да аплицираат локални препарати, да прават хемиски пилинзи па дури и орално да користат колагенски препарати и на 14-годишна воздраст, што воедно е загрижувачки.
Лекување
Апелирам до сите со оваа патологија да побараат стручно мислење и преглед од лекар дерматовенеролог.
Лекувањето на акните вклучува користење на ретиноиди (локално и преку уста), системски и локални антибиотици.
Tерапијата е различна и се ординира според шема, протокол за лекување во зависност од формата на акните.
Лекувањето на акните трае од 3-6 месеци, со редовни месечни контролни прегледи кај лекар дерматовенеролог, поради нусефектите од системската терапија и резистентноста на локалната антибиотска терапија.
Лекарот е тој што треба да направи проценка кога да се започне со хемиски пилинзи, каков да биде пилингот – површински или длабок, и кога да се вклучи ласерка терапија во целокупниот третман на акните.
Иако процесот на лекување е бавен, резултатите по соодветно ординирана терапија се секогаш добри! На крај, задоволството е големо и заемно, и кај пациентот и кај лекарот. Со видните резултати и регресија на кожните промени се враќа и самодовербата на личноста.
Д-р Галина Наќеска, специјалист дерматовенеролог
ЈЗУ Поликлиника на секундарно ниво „Железара“ Скопје
