Американското Министерство за правда објави преработена верзија на правниот документ врз основа на кој ФБИ изврши претрес и заплени доверливи владини документи од домот на поранешниот претседател Доналд Трамп во Флорида.
Документот открива нови детали за доверливите документи што Трамп ги чувал во својот дом во Мар-а-Лаго до јануари оваа година, од рачно напишаните белешки на претседателот до информации за националните разузнавачки извори, објави Гласот на Америка.
Четиринаесет од 15-те кутии пронајдени на имотот на поранешниот претседател содржеле доверливи документи, соопшти ФБИ во поднесокот со кој се оправдува налогот за претрес на имотот на Трамп.
Редактираниот документ од 38 страници содржи дополнителни детали за тековната кривична истрага, која му донесе нова правна опасност на Трамп бидејќи тој ја поставува основата за уште една претседателска кандидатура.
Според Гласот на Америка, објавената верзија го прикажува степенот на чувствителност на владините документи пронајдени во Мар-а-Лаго и открива дека ФБИ било загрижено дека документите биле нелегално лоцирани таму.
Од 38-те страници на документот што денеска беа депечатени, 23 беа во голема мера затемнети, додека 11 беа целосно редактирани.
Објавено е и писмо од адвокатот на Трамп, во кое се жали на истрагата на Министерството за правда, велејќи дека Трамп има овластување да го декласифицира документот.
Претресот на Мар-а-Лаго на 8 август беше спроведен како дел од федералната истрага за тоа дали Трамп незаконски отстранил документи кои легално припаѓаат на Националниот архив по заминувањето од функцијата. Меѓу нив има и некои документи со ознака „строго доверливи“.
