Турскиот претседател Таип Ердоган денес пред Генералното собрание на Обединетите нации изјави дека ОН повеќе не можат да ја исполнуваат својата должност за одржување на мирот и повика на реформа на Советот за безбедност. Ердоган со години се залага за посеопфатна и поинклузивна структура на Советот за безбедност.
„Да признаеме дека системот во кој волјата на повеќе од 190 земји зависи од каприците на пет земји, не е ниту праведен, ниту способен целосно да изгради доверба“, изјави тој. „Обединетите нации, основани пред 81 година за да го одржуваат мирот и безбедноста, станаа немоќни да ја исполнат таа задача или пак се спречени во тоа“, додаде тој.
Ердоган ја осуди и ситуацијата во Газа, велејќи дека „никој со чувство за правда и совест – никој што во срцето носи хуманост, сочувство и милосрдие – не може да замижи“ пред она што се случува таму.
„Неправдата кон нашите палестински браќа и сестри ја рани совеста“
„(Палестинскиот претседател) Махмуд Абас веќе две години по ред не може да го заземе своето место во оваа сала. Оваа неправда кон нашите палестински браќа и сестри ја рани совеста“, рече Ердоган.
Тој ги повика земјите што не ја признаваат палестинската држава да го преиспитаат својот став и ги охрабри сите нации да го зголемат притисокот врз Израел за да се стави крај на војната во Газа, која тој ја опиша како „најнехуманиот и најсрамниот концентрационен логор на нашата ера“.
Турција, членка на НАТО, е еден од најгласните критичари на Израел и неговата војна во Газа, тврдејќи дека нападите претставуваат геноцид. Турција постојано повикува на меѓународни мерки против Израел, кој ги отфрла обвинувањата за геноцид.
