Здравствените власти во Русија го одобриле тестирањето на вакцинација против коронавирусот со комбинација од вакцини од два различни производители, поточно со „Спутник“ и „Астра зенека“.
Руската „Спутник“ ќе биде комбинирана со вакцината создадена од „Астра зенека“, во соработка со „Оксфорд“, во рамките на мало истражување, пренесува „Јуроњуз“. Истражувањето ќе трае до март следната година, а ќе вклучи 150 волонтери. Целта е да се види каква имунолошка реакција ќе создаде комбинирањето на двете вакцини.
Комбинирањето на „Спутник“ со вакцината на „Астра зенека“ било предложено од произведувачите на руската вакцина во ноември. Според нив, оваа комбинација би можела да ја зголеми ефикасноста на британската вакцина. Двете вакцини се произведуваат со слична технологија, а вклучуваат безопасен вирус кој внесува генски материјал од протеинот на ковид-19 во телото, со што создава имунолошка реакција.
Претходно, слични истражувања за комбинирање вакцини биле спроведувани и во Азербејџан, Аргентина и Обединетите Арапски Емирати.
Истражувачи од Велика Британија истовремено тестираат комбинации на вакцината на „Астра зенека“ со други вакцини, меѓу кои и онаа на „Фајзер“ и на „Модерна“. Првичните резултати покажуваат дека комбинацијата на вакцините на „Астра зенека“ и „Фајзер“ создава силна имунолошка реакција.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
