Денес се одржуваат избори во две германски покраини, Баден-Вуртемберг и Рајланд-Пфалц. Како што јавуваат германските медиуми овие избори претставуваат тест за владеењето на канцеларката Ангела Меркел и конзервативната Христијанско-демократска унија (ЦДУ) пред сојузните избори во септември.
Меркел е на чело на државата од 2005 година и нема намера повторно да се кандидира, што може негативно да се одрази на резултатите на ЦДУ на сојузните избори, анализираат медиумите во оваа земја.
Во двете сојузни држави, сегашните политичари на чело на владата имаат големи шанси да ги задржат своите позиции. Во Баден-Виртемберг, Зелените и нивниот премиер Винфрид Кречман се на власт веќе десет години. Тој владееше во првите пет години во коалиција со Социјалдемократската партија на Германија (СПД), а последните пет со Христијанско-демократската унија (ЦДУ) предводена од канцеларката Меркел.
Според најновите анкети, рекордни 32 до 34 проценти од 7,7 милиони граѓани со право на глас би можеле да гласаат за Зелените во оваа економски силна федерална провинција, а според анкетите, околу 25 проценти би гласале за ЦДУ, што е послаб резултат отколку на последните избори пред пет години.
Екстремно десничарската, популистичка Алтернатива за Германија (АфД) може да смета на поддршка од 12 проценти, а социјалдемократите од СПД на 10 проценти од гласачите, што би значело загуба за обете партии во споредба со последните избори.
Набљудувачите предвидуваат продолжување на сегашната зелено-демокристијанска коалиција, чија работа исто така се смета за успешна на федерално ниво. Кречман е првиот и засега единствен премиер на федерална покраина од редовите на Зелените. Тој е член на умереното крило на партијата, а со комбинација на успешна економска политика и типични зелени теми како што се откажување од нуклеарна енергија, тој го погоди расположението на гласачите во оваа богата, но еколошки освестена федерална провинција.
