Членството на Црна Гора во Европската унија е реално остварлива цел, изјави германскиот канцелар Фридрих Мерц во своето воведно обраќање на самитот во рамките на Берлинскиот процес во Милочер. Тој истакна дека Црна Гора постигнала значителен напредок и речиси целосно ги завршила преговорите за пристапување.
Мерц додаде дека реформите, политичката волја и регионалната соработка се клучни за понатамошниот напредок на целиот Западен Балкан.
„Покажувате напредок и докажувате дека пристапувањето кон Европската унија е навистина возможно. Бевте одлучни, а вашите напори вродија со плод. Ова е регион во движење – регион на промени – но тие промени мора да дојдат одвнатре. Тоа е една од основните идеи зад Берлинскиот процес: да се собере Западен Балкан на иста маса, како и да се иницира и зајакне регионалната соработка“, рече Мерц.
Мерц потсети на средбата одржана во Тиват во јуни, истакнувајќи дека оттогаш се направени видливи чекори кон зајакнување на Берлинскиот процес.
Тој напомена дека заедно со францускиот претседател Емануел Макрон претставиле заеднички предлози за проширување, од кои многу биле прифатени од Европската комисија, при што ѝ се заблагодари на комесарката Марта Кос.
Германскиот канцелар нагласи дека државите од регионот мора да покажат одлучност во спроведувањето на реформите за да продолжат со европската интеграција. Тој исто така се осврна на протестите и политичките тензии, укажувајќи на важноста од зачувување на мирот и отфрлање на насилството.
„Протестите во регионот нè потсетуваат дека мораме да продолжиме со ширење и зацврстување на мирот. Кога се соочуваме со протести, без разлика дали во Европската унија или на друго место, насилството не смее да биде опција за ниту една страна“, рече тој.
Мерц предупреди дека нерешените прашања од минатото и политичката поларизација го забавуваат градењето на постабилна Европа.
„Многу е тешко да се напредува ако минатото постојано нè влече назад. Поларизацијата никогаш нема да донесе поуспешна Европа. Ние го отфрливме величањето на воените злосторници и, доколку сакаме подобра иднина за нашите деца, не смееме дополнително да поттикнуваме конфликти. Мораме да го нормализираме дијалогот меѓу Приштина и Белград“, рече Мерц.
Тој повика на одговорност и конкретен напредок во решавањето на отворените прашања во регионот и нагласи дека Германија останува посветена на Берлинскиот процес и на европската перспектива на Западен Балкан.
