Цените на суровата нафта од типот „Брент“ на 1 октомври ја надминаа границата од 100 долари за барел, поттикнати од распоредувањето на трет американски носач на авиони на Блискиот Исток и од запирањето на кинескиот извоз на гориво. Како одговор на растот на цените и проблемите со снабдувањето, Франција размислува да пушти во оптек нафта од стратешките резерви, потврдија тројца дипломати од ЕУ, пренесува Euronews.
Париз предлага комбинирано пуштање во оптек на сурова нафта и дизел, а идејата беше претставена на состанок меѓу Европската комисија и земјите-членки. Состанокот се одржа кратко откако францускиот претседател Емануел Макрон и американскиот претседател Доналд Трамп разговараа за глобалната енергетска ситуација.
Франција сè уште нема поднесено официјален предлог, но според дипломатски извори, таа сигнализирала подготвеност да пушти во оптек 50 милиони барели дизел и дополнителни 50 милиони барели сурова нафта од резервите на Меѓународната агенција за енергетика (IEA).
„САД побараа 100 милиони барели, но ЕУ не се согласува со тоа, па Франција предложи формула ’50 плус 50’“, изјави еден дипломат од ЕУ.
Соединетите Држави го зголемуваат притисокот врз европските земји да пуштат во оптек повеќе нафта од стратешките резерви. Целта на Вашингтон е да го запре растот на цените на горивото пред изборите за Конгресот во ноември. Истовремено, администрацијата на Трамп размислува за забрана на извозот на дизел.
Американскиот министер за енергетика веќе предложи Европската унија во рок од три месеци да пушти на пазарот 120 милиони барели од своите резерви, што би претставувало алтернатива на забраната за извоз.
Францускиот претседател Макрон претходно ја опиша евентуалната американска забрана за извоз на дизел како катастрофална, бидејќи Франција би била меѓу најпогодените земји.
Текстот Цената на нафтата надмина 100 долари, Франција размислува да ги пушти во оптек своите резерви е превземен од МАКФАКС.
