Советот на Град Скопје денес донесе одлука со која се намалува бројот на предвидените нови вработувања во јавните претпријатија и установи на Град Скопје.
Од Град Скопје велат дека со одлуката се прави оптимизација на бројот на вработени, со цел поодговорно управување со градскиот буџет и насочување на човечките ресурси кон работните места кои се директно поврзани со функционирањето на градот и услугите за граѓаните.
Приоритет ќе имаат теренските и оперативните позиции каде што постои реална потреба од дополнителен кадар – пред сè возачи во ЈСП, работници и возачи во ЈП „Комунална хигиена“, како и друг оперативен кадар неопходен за одржување на градските услуги.
Истовремено, административните позиции се сведуваат на минимум, со цел средствата и кадарот да бидат насочени таму каде што има најголема потреба – на улиците, во парковите, во јавниот превоз и во останатите услуги кои граѓаните ги користат секојдневно.
„Секој денар од граѓаните мора да има јасна цел, а секое работно место вистинска потреба и конкретна работа. Скопјани заслужуваат функционален јавен сектор кој ќе ја оправда нивната доверба со квалитетни и навремени услуги“, порачаа од Град Скопје.
Од Градот посочуваат дека ова преструктуирање има за цел поефикасно работење, поодговорно управување со јавните средства и создавање услови за подобрување на клучните градски услуги.
Со новата политика, приоритет се дава на работните места кои директно придонесуваат за функционирањето на Скопје и секојдневниот живот на граѓаните.
Град Скопје продолжува со воведување поголема одговорност, рационализација и насочување на ресурсите кон реалните потреби на градот и скопјани.
