Претседателите на парламентите на Бугарија и на Република Северна Македонија, Михаела Доцова и Африм Гаши, на средба во Софија разговараа за можностите за подобрување на соработката и парламентарниот дијалог. Гаши престојува во Бугарија по повод 13. пленарна сесија на Парламентарното собрание на Процесот за соработка во Југоисточна Европа, јавува Трибуна.
Доцова изрази загриженост поради зачестените прояви на антибугарско однесување во Северна Македонија и нападот врз дипломатски возила на бугарската мисија. Таа ја поздрави брзата реакција на надлежните власти, но нагласи дека Бугарија очекува сторителот да добие „правична казна“.
Претседателката на бугарското Народно собрание истакна дека целосното исполнување на Европскиот консензус од јули 2022 година е единствениот пат за напредок на Северна Македонија кон ЕУ. „Тоа не подлежи на договарање“, рече Доцова, посочувајќи ја потребата од уставни измени во земјата.
По средбата таа го оцени разговорот како позитивен и конструктивен. Доцова нагласи дека биле разгледани соработката меѓу двете земји, значењето на Коридорот 8, инвестициите, како и заеднички иницијативи во културата, младинските политики и спортот.
Гаши изјави дека неговата посета на Софија е израз на желба за подобрување на добрососедските односи и за продлабочување на дијалогот меѓу двата парламента. „Треба да одиме напред и да најдеме начин да бидеме заедно во ЕУ“, рече тој.
На средбата Гаши упати покана до бугарска парламентарна делегација, предводена од Доцова, да го посети Скопје.
