Основачот на „Амазон“, Џеф Безос, предвиде на технолошка конференција во Париз дека вештачката интелигенција (ВИ) ќе создаде поголема потреба од работници, и дека нема да ги замени луѓето. Безос ги отфрли растечките загрижености дека ВИ ќе замени голем број работници, тврдејќи дека технологијата всушност ќе отвори нови можности и ќе ја зголеми побарувачката за човечка работна сила, објави Би-Би-Си.
Неговиот став е во спротивност со други технолошки и политички фигури, вклучувајќи го и поранешниот британски премиер Риши Сунак, кој неодамна изјави дека ВИ влијае на изгледите за работа на младите луѓе.
Знам дека многу луѓе, вклучително и многу паметни луѓе, се многу загрижени дека ВИ ќе ги остави луѓето без работа“, рече Безос. „Воопшто не се согласувам со тој став. Всушност, мислам дека ВИ ќе создаде недостиг на работна сила.“
Милијардерот презентираше оптимистичка визија за идната улога на вештачката интелигенција во општеството, сугерирајќи дека луѓето не се ограничени од недостаток на амбиција, туку од пречките што технологијата може да помогне да се отстранат.
Тој, исто така, зборуваше за својот нов потфат со вештачка интелигенција, Прометеј, насочен кон забрзување на физичкото производство, сектор кој станува сè поавтоматизиран.
Од друга страна, Конгресот на британските синдикати предупреди дека технологијата со вештачка интелигенција би можела да ја повтори „катастрофата на деиндустријализацијата“, бидејќи акционерите стануваат побогати, а работните места се „деградираат или се раселуваат“. Сепак, синдикатите додаваат дека вештачката интелигенција, доколку се развие правилно, може да има трансформативен потенцијал и дека работниците би можеле да имаат корист од зголемената продуктивност.
фото/ЕПА
Текстот Безос: Вештачката интелигенција ќе создаде повеќе работни места, а нема да ги замени луѓето е превземен од МАКФАКС.
