Во Германија се разгледуваат мерки за засилување на безбедносните капацитети поради зачестените прелети на беспилотни летала. Сојузниот министер за внатрешни работи, Александер Добринт, упати барање за воведување трајна заштита на Бундестагот и на другите уставни тела, нагласувајќи дека е потребно системско решение за овој вид современи предизвици.
Разграничување на надлежностите за заштита
Во официјалното писмо испратено до претседателката на Бундестагот, Јулија Клекнер, за кое извести весникот „Рајнише пост“, Добринт посочува дека заштитата на државните институции бара постојано достапна анти-дрон одбрана. Оваа реакција следува откако Клекнер во декември побара појаснување за тоа како новата специјализирана единица на Сојузната полиција може да се вклучи во обезбедувањето на парламентот.
Според одговорот на сојузниот министер, оваа единица има капацитет да пружи привремена поддршка, но примарната одговорност за безбедноста на воздушниот простор околу Бундестагот и понатаму останува на берлинската полиција.
Регистрирани инциденти во европски рамки
Темата за безбедноста на воздушниот простор е актуелна и на пошироко европско ниво, каде безбедносните служби на НАТО бележат слични случаи на неавторизирани прелети. Неодамна, ваков настан беше забележан и во Литванија, каде државниот врв мораше превентивно да се засолни по навлегување на беспилотна летна во воздушниот простор.
Експертите дел од овие инциденти ги поврзуваат со надворешно попречување на ГПС-сигналите, што предизвикува леталата да го изгубат курсот. Дополнително, од Оперативната команда на германската војска наведуваат дека зачестените прелети над воените објекти и критичната инфраструктура во земјата можат да бидат поврзани со надворешни активности за извидување.
Законски измени и техничка модернизација
Како одговор на овие предизвици, во Германија веќе се имплементираат измени во Законот за безбедност на воздушниот сообраќај. Со новите регулативи се прошируваат овластувањата на сојузната полиција и на војската, со што се овозможува побрза процедура за одлучување и координација при реакција во итни ситуации.
На технички план, весникот „Билд“ пренесува дека во Берлин се планира поставување на координирана мрежа од 62 радиосензори кои ќе служат за рано откривање на беспилотните летала. Меѓу опциите за неутрализација на евентуалните закани, покрај стандардните методи, се разгледува и употребата на специјални дронови-пресретнувачи опремени со заштитни мрежи.
Текстот Германија ја засилува одбраната: расте загриженоста од прелети на дронови над клучните институции е превземен од МАКФАКС.
