Портпаролот на иранското Министерство за надворешни работи, Есмаил Бакаеи, во објава на социјалната мрежа Икс изјави дека американско-израелската војна против Иран е „војна што ќе го одреди самото значење на ‘добро’ и ‘зло’ во нашето време и за иднината“.
„Ова е војна меѓу професионални лажговци кои измислуваат оправдувања за злосторствата и горд народ кој ја брани својата татковина и човечкото достоинство потпирајќи се исклучиво на сопствената сила и решителност“, напиша портпаролот.
„Тоа е војна меѓу оние чии одлуки се замаглени од морален компромис и оние кои дејствуваат со чиста совест. Ова е одлучувачка борба за иднината на човештвото. Таа ќе одлучи дали тешко стекнатите достигнувања на цивилизацијата – човековите права, владеењето на правото и основниот морал – ќе преживеат или ќе бидат избришани“, заклучи Бакаеи.
За потсетување, иранската новинска агенција Фарс објави, повикувајќи се на добро информиран извор, дека Техеран нема да влезе во втора рунда разговори со САД додека не се исполнат пет услови за градење доверба. Изворот тврди дека Иран ги смета овие барања за „минимални гаранции“ потребни за продолжување на какви било разговори со Вашингтон, пренесува Анадолија.
Пет ирански услови
Според Фарс, Иран бара крај на војната на сите фронтови, посебно во Либан, укинување на санкциите, ослободување на замрзнатите ирански средства, исплата на воена отштета и признавање на суверените права на Иран над Ормускиот теснец.
Техеран, наводно преку пакистански посредници, изјави дека продолжувањето на американската поморска блокада во Арапското Море и Оманскиот Залив по прекинот на огнот дополнително ја продлабочило недовербата кон САД.
Текстот Техеран: Ова е војна меѓу професионални лажговци кои измислуваат оправдувања за злосторствата и горд народ кој ја брани својата татковина е превземен од МАКФАКС.
