Православните христијани денеска го одбележуваат големиот празник Цветници, познат и како Цветоносна недела или Врбица, кој се празнува една недела пред Велигден и претставува вовед во Страдалната седмица.
Празникот е посветен на свеченото влегување на Исус Христос во Ерусалим, кога народот го пречекал со цвеќе, врбови и маслинови гранчиња, постилајќи ги пред него како знак на почит и признание.
Цветници се празнуваат веднаш по Лазарева сабота и го означуваат почетокот на најтешката и најзначајна седмица во христијанството – периодот на Христовото страдање, распнување и воскресение.
