Советот за електронски медиуми ја избра Милена Милотинова за нов генерален директор на Бугарската национална телевизија, јавува БГНЕС.
Милена Милотинова ќе го замени досегашниот носител на функцијата, Емил Кошлуков.
Милена Милотинова е телевизиски новинар повеќе од 30 години. Дипломирала бугарска филологија на СУ „Климент Охридски“ и „Англиски јазик и литература“, а се специјализирала во Би-Би-Си и Ен-Би-Си.
Почнува да работи во БНТ уште како студентка и со текот на годините станува едно од препознатливите имиња на БНТ. Работи во БНТ меѓу 1990 – 2001 година, прво како репортер, а од 1992 година и како водител на „По света и у нас“.
Во 1998 година го снима документарниот филм „Хроника на едно национално предавство“, кој раскажува за насилната македонизација на Пиринскиот крај меѓу 1946 – 1948 година.
Во 1999 година го снима документарниот филм „Само затоа што беа Бугари“, кој раскажува за политичкиот терор во Социјалистичка Република Македонија врз локалните Бугари.
Освен за Македонија, Милотинова создава и бројни документарни филмови за Бугарите од Западните покраини и на други теми уште во почетокот на 90-тите години. Нејзиниот филм „Спасените“, за спасувањето на бугарските Евреи, е прикажан со голем интерес и во Израел и во Луксембург.
