Бугарска делегација, предводена од бугарскиот амбасадор во Скопје, Желјазко Радуков, му оддаде почит на големиот бугарски револуционер Гоце Делчев, по повод 154-та годишнина од неговото раѓање. Амбасадорот, претставници на бугарската дипломатска мисија и членови на бугарската заедница во Северна Македонија положија венци и свежо цвеќе пред саркофагот на Делчев во дворот на црквата „Св. Спас“, јавува Трибуна.
„И оваа година повторно сме тука за да одбележиме еден светол датум од нашата заедничка историја и да му оддадеме почит на еден од нашите големи револуционери – Гоце Делчев. И секојпат кога стојам пред саркофагот на Георги Делчев, си го поставувам прашањето зошто нешто што треба да нè обединува, толку многу нè разделува. И зошто во една современа, независна, потенцијално европска наша соседна Република Северна Македонија е толку тешко да се прифати и улогата на бугарскиот народ, и на Бугарите, како Делчев, токму за таа слобода и независност. Потсетувајќи се на зборовите на Делчев дека го разбира светот „како поле за културно натпреварување меѓу народите“, си давам сметка колку би се згрозил од современиот дискурс и од говорот на омраза, без оглед на неговиот извор. Не би се согласил со таков пристап. Не би го прифатил, би го осудил, како што го осудуваме и сите ние“, изјави Радуков при положувањето на венците пред присутните.
Гоце Делчев е роден на 4 февруари 1872 година во Кукуш, во семејството на Султана и Никола Делчеви. Образованието го стекнал во бугарската машка гимназија во Солун и на Воената академија во Софија. Предавал во Штип, а како член на Централниот комитет на ТМОРО работел на создавање мрежа од бази, комитети и комитетски пунктови на Организацијата. Учествувал на Солунскиот конгрес на ВМРО (1896 година), а до 1901 година бил задграничен претставник на ВМРО во Софија. Бил творец на организираните вооружени структури на Организацијата во Македонија и Одринско.
По неговото убиство на 4 мај 1903 година, неговите посмртни останки биле чувани во Баница до 1917 година, кога биле пренесени во Ксанти, а потоа во Софија. До 1923 година ковчегот со коските бил чуван во домот на Михаил Чаков. Посмртните останки на Делчев биле пренесени во црквата „Св. Спас“ во Скопје на 10 октомври 1946 година, по договор меѓу комунистичките власти во тогашните НРБ и ФНРЈ.
