Украинскиот претседател присуствуваше на официјалната инаугурација на папата Лав XIV во Ватикан во неделата. Тој беше облечен во црни панталони, темна кошула и црна јакна, облека слична на онаа што ја носеше на погребот на папата Франциск.
Неговата сопруга Олена, исто така, дојде со Зеленски. Облеката на претседателот често е предмет на дискусија на социјалните мрежи. Многумина се прашуваат зошто тој не носи одело, особено во пригоди како погребот на папата Франциск, каде што протоколот го бара тоа.
Уште во февруари, Трамп саркастично коментираше како украинскиот претседател бил облечен за нивниот состанок во Белата куќа. Тој состанок заврши со жестока вербална размена, а тензиите дополнително се зголемија кога еден новинар се придружи на разговорот, коментирајќи го лежерниот изглед на Зеленски.
Тој носеше црни панталони, чизми и црн џемпер со извезен украински трозабец, што го наведе новинарот Брајан Глен да го обвини за „непочитување на достоинството“ на Овалната соба. Сепак, Зеленски не се двоумеше да објасни зошто не се занимава со одела во екот на руската инвазија на Украина.
Истата логика е зад неговиот избор на облека за погребот на папата Франциск, како и за инаугурацијата на папата Лав – затоа што претседателот сака да испрати порака со својата облека секој пат кога е на светската сцена.
Со носењето облека што личи на воени униформи, тој наводно сака да ги потсети луѓето ширум светот дека неговата земја сè уште е во војна со Русија.
Одговарајќи му на Глен во февруари, Зеленски рече: „Ќе носам одело кога ќе заврши оваа војна. Можеби нешто како твоето, можеби нешто подобро. Ќе видиме, можеби нешто поевтино.“
Креативниот директор на брендот Дамирли, кој стои зад некои од најзначајните комбинации на Зеленски, исто така откри како претседателот комуницира преку својата облека.
Дизајнерката Елвира Гасанова изјави за Politico: „Кога светските лидери го гледаат Зеленски во воен стил, тоа е сигнал: „Украина е во војна и јас сум дел од оваа борба.“
„За време на војна, претседателот не е само политичар, туку и врховен командант на војската и цивилите под воена состојба“, рече таа.
„Класичното одело би се перцепирало како дистанца од реалноста на бојното поле. Неговата облека му помага да го задржи вниманието на светот врз војната во Украина.“
Украинската модна историчарка Зоја Звињакивска исто така верува дека лидерот, и покрај неговиот полежерен стил во споредба со другите меѓународни лидери, сепак „покажува почит“ преку својата облека.
„Да, тоа не е одело, но е еден вид средно решение. Ако Зеленски ја соблече воената униформа и облече одело, што значи тоа? Тоа значи дека се согласил дека војната е завршена“, заклучи таа.
Текстот Зеленски без одело кај Папата: „Со неговата облека сака да ги потсети луѓето дека Украина сè уште е во војна со Русија е превземен од МАКФАКС.
