Европската комесарка за проширување, Марта Кос, за време на својата посета во Бугарија, изјави дека геополитиката значително се променила во последните години, не само поради војната во Украина, туку и поради глобалните влијанија од САД. „Денес мораме да дејствуваме побрзо, да го разбиеме стариот начин на размислување и да го забрзаме процесот на проширување,“ изјави Кос, јавува БГНЕС, пренесува Трибуна.
Според Кос, Европската унија за прв пат во историјата на проширувањето се соочува со надворешни сили кои се стремат кон нејзиниот неуспех. „Проширувањето е приоритет и тој е првостепен,“ истакна таа, насочувајќи го фокусот кон земјите од Западен Балкан.
Таа посочи дека земјите од Западен Балкан се во различна позиција во споредба со Украина, притоа издвојувајќи ги Црна Гора и Албанија како водечки кандидати. „Пред нас е отворањето ново поглавје со Албанија овие денови. Ако преговорите со Црна Гора продолжат со ова темпо, би можеле да ги завршиме до 2026 година, а со Албанија до 2027 година,“ додаде Кос.
Во однос на Северна Македонија, Кос изрази надеж за брзо отворање на преговорите. „Знаеме дека Бугарија и Северна Македонија ќе постигнат договор за заштитата на бугарското малцинство,“ рече Кос.
Таа исто така нагласи дека очекува Србија да се врати на својот европски пат и додаде: „Има политичка криза во Босна, се надеваме дека и таму ќе започнеме преговори уште оваа година.“ Кос призна дека ситуацијата е сложена, бидејќи земјите од Западен Балкан имаат свои специфики.
„Бугарија добро го познава регионот и е добро да го поддржува процесот на интеграција,“ истакна Кос, додавајќи дека „убедена сум дека можеме да извлечеме важни лекции од минатото.“
