Министерот за надворешни работи и надворешна трговија, Тимчо Муцунски, денеска на одвоени средби ги прими амбасадорката на Кралството Шведска, Ами Ларсон Џеин, и амбасадорот на Чешката Република, Јарослав Лудва.
На средбата со амбасадорката Ларсон Џеин беа разгледани можностите за продлабочување на билатералната соработка, при што беше истакнато дека односите меѓу двете земји континуирано се зајакнуваат. Посебен акцент беше ставен на унапредувањето на економската соработка и трговските односи, како и на проширувањето на соработката со конкретни проекти и техничка поддршка во рамките на билатералната соработка со Шведската развојна агенција SIDA.
На средбата со амбасадорот Лудва беше поздравена принципиелната и конструктивна улога на Чешка во регионот, како дел од заедничкото европско семејство. Разговорите опфатија и подготовките за Третата сесија на Мешовитиот комитет за економска соработка, која ќе се одржи на 10 и 11 март 2025 година во Прага, а на која македонската страна ќе биде претставена на високо ниво. Оваа редовна сесија ги одразува реалните потенцијали за инвестирање во нашата држава и ги отвора бројните можности за натамошна економска соработка.
Во рамки на двете средби беа разменети мислења за актуелните геополитички случувања и нивното влијание врз стабилноста на регионот. Министерот Муцунски ја истакна силната определба на Владата за продолжување на реформските процеси на патот кон европската интеграција и продлабочување на регионалната соработка.
