Алијанса за Албанците го поддржува секое вложување во здравството, но изразува длабока загриженост за неправедната распределба на инвестициите во здравствениот сектор од страна на актуелната влада. Додека милиони евра се планираат за инвестиции во болницата „8 Септември“ во Скопје, клиничките болници во Тетово и Штип продолжуваат да се соочуваат со неприфатливи услови и недостаток на инвестиции.
„Владата го третира здравствениот систем на две нивоа: едно за Скопје и друго за регионите. Ова е очигледна дискриминација кон пациентите во Тетово, Штип и сите други региони надвор од главниот град, кои имаат исто право на квалитетни здравствени услуги. И покрај многубројните ветувања, Клиничката болница во Тетово и онаа во Штип сè уште работат со застарена инфраструктура, недостиг на модерна опрема и ограничени капацитети за лекување на пациентите. Во меѓувреме, владата одлучи јавните средства да ги насочи исклучиво кон една болница во главниот град, целосно игнорирајќи ги потребите на регионалните болници“, посочуваат од Алијанса за Албанците
Бараат од Министерството за здравство:
1. Јавно да ги објави критериумите врз основа на кои е донесена одлуката за инвестиција во „8 Септември“, додека Тетово и Штип се изоставени.
2. Итно да го ревидира буџетот за здравство и да предвиди конкретни инвестиции во регионалните болници, особено во Тетово и Штип.
3. Да се преземат итни чекори за да се обезбеди еднаков третман за сите граѓани, без разлика каде живеат.
„Алијансата за Албанците ќе го следи ова прашање со сите политички и институционални средства за да гарантира дека пациентите во Тетово, Штип и сите региони имаат пристап до квалитетна здравствена заштита, исто како и граѓаните на Скопје“, дополнуваат оттаму.
