„Гордана Сиљановска-Давкова, како добар правник, многу добро знае дека обврските преземени со меѓународни договори едноставно мора да се почитуваат“.
Ова денеска го изјави претседателот на Бугарија, Румен Радев, коментирајќи ја вчерашната изјава на македонската претседателка дека „излезното, соломонско решение за спорот со Бугарија се уставни измени со одложено дејство“ јавува бугарската агенција „БГНЕС“, пренесе А1 он.
Радев, како што јавува агенцијата, го демантираше тврдењето на македонската претседателката дека на нивната средба во Баку тој не го коментирал предлогот за уставни измени со одложено дејство.
„Искажав многу јасна оценка и уште еднаш подетално ја запознав г-ѓа Сиљановска со преговарачката рамка и општиот европски консензус од јуни 2022 година, прифатен и со согласност на тогашната Влада на Северна Македонија. Исто така, ја запознав и со нашиот Договор за пријателство, добрососедство и соработка и, што е многу важно, со вториот протокол според овој Договор. Тоа се меѓународни обврски, а г-ѓа Сиљановска, како добар правник, многу јасно знае дека обврските преземени според меѓународните договори едноставно мора да се исполнат. Уште еднаш ја истакнав нашата подготвеност да помогнеме за побрзо да се достигнат условите поставени во овие меѓународни документи, за да се отвори вратата за почеток на преговорите“ – изјави Радев.
Сиљановска-Давкова во вчерашно тв интервју рече дека е оптимист дека работите може да се придвижат во скоро време и земјава да ги почне преговорите со Европската Унија и дека според неа излезното, соломонско решение за спорот со Бугарија е решението за уставни измени со одложено дејство.
За ваквото решение, како што рече таа, разговарала и со бугарскиот претседател Румен Радев, но и со сите други претставници на земји од ЕУ, како и други земји пријатели и поддржувачи, кај кои наишла на разбирање.
