Денеска се навршуваат 72 години од бруталното убиство на петте струмички студенти од режимот на југословенскиот диктатор Јосип Броз Тито, јавува БГНЕС, пренесува Трибуна.
Борис Белев (22), студент по физика, Стево Топчев (19) студент по право, Георги Костуранов (21) студент по медицина, Георги Јар’мов (22) студент по геологија и Мирко Пецев (23) студент по право стануваат симбол на Македонија, како жртви на режимот на Тито. Нивната групна фотографија станува и еден од симболите на најстарата емигрантска организација на македонските Бугари – Македонската патриотска организација /МПО/ во САД и Канада.
Студентите биле убиени на 13 август 1951 година недалеку од селото Дорломбос, во планината Беласица. Сите биле застрелани со два куршуми – едниот во срцето, а другиот во главата.
Пред да бидат погубени, студентите биле на забава од каде биле изведени од агенти на УДБА. Случајот добил широк меѓународен одзив, а набргу потоа во Њу Џерси, САД и во Сао Паоло, Бразил, Македонската патриотска организација создала свои структури под името „Струмишка петорка“.
Следниот ден телата на младите биле оставени пред зградата на општината покриени со најлони. Четворица од нив биле погребани во присуство на нивните роднини надвор од гробиштата, а петтиот, Борис Белев, бил погребан на протестантските гробишта во градот. Сите тие се прогласени за „национални предавници“ од режимот во Белград и Скопје.
