Шпанскиот регулатор за конкуренција започна истрага за тоа дали дигиталната платформа Booking.com се обидува да ја потисне конкуренцијата од онлајн туристичките агенции при резервирање хотелско сместување.
Истрагата е покрената врз основа на две жалби поднесени од Шпанската асоцијација на менаџери на хотели (AEDH) и Мадридската асоцијација на хотелиери, објави во понеделникот агенцијата за конкуренција CNMC.
Регулаторот се сомнева дека Booking ги прекршил шпанските закони
Здруженијата тврдат дека Booking.com наметнала неправедни услови за хотелите во Шпанија и применила мерки кои може да имаат ефект да ги потиснат другите онлајн туристички агенции и каналите за онлајн продажба.
„Ние навистина сакаме оваа практика да заврши“, изјави претседателот на AEDH, Мануел Вегас, за Ројтерс.
Регулаторот објави дека постојат разумни основи за сомневање дека платформата можеби ги прекршила шпанските закони за конкуренција и членот 102 од Договорот за функционирање на ЕУ, кој им забранува на компаниите да ја злоупотребуваат доминантната позиција на пазарот, се вели во соопштението.
„ Booking можеби ги искористил шпанските хотели“
Некои од спорните практики може да претставуваат злоупотреба на доминантната позиција на Booking.com во однос на конкурентните брокерски услуги понудени на хотелите од различни онлајн агенции, објаснуваат од CNMC. Тие исто така додаваат дека Booking.com можеби ги искористил шпанските хотели кои се финансиски зависни од него, без да наведат примери на спорни практики.
CNMC ќе го испита случајот во следните 18 месеци и ќе ги слушне аргументите од двете страни. Доколку се открие дека го прекршил законот, Booking.com може да се соочи со казни од 100.000 евра до повеќе од 10 милиони евра по прекршување.
Асоцијацијата на хотелиери во Мадрид не одговори веднаш на барањето на Ројтерс за коментар на веста за започнување на истрагата.
Booking.com соопшти дека ќе соработува со CNMC во истрагата за да одговори на сите прашања во врска со нејзините операции во Шпанија.
