Спасени се тројца рудари од рудникот „Трепча“. Шеесет рудари остануваат заробени на 11-тото ниво на рудникот во Косово, објави Телеграф.
Пожарникарите продолжуваат со напорите за извлекување на преостанатите рудари.
Ибрахим Јанузи, претседател на Синдикатот на рударите на „Трепча“, изјави дека рударите останале заробени во рудникот поради дефект во електроенергетскиот систем.
Јанузи рече дека дефектот настанал околу 19:30 часот, предизвикан од палење на далноводите за висок напон и дефект на трафостаницата што го опслужува првиот тунел.
Според него, дел од рударите веќе почнале да излегуваат преку алтернативни патишта.
Тој извести дека постои комуникација со рударите преку индуктивна телефонска линија и дека нивната состојба е стабилна.
„Нивната состојба моментално е стабилна; нема причина за загриженост“, изјави Јанузи, додавајќи дека еден рудар наводно има повреда на ногата, што би можело да му го отежне излегувањето пеш.
Јанузи рече дека, врз основа на информациите од теренот и комуникацијата со раководството, на далноводот што го снабдува рудникот нема поголеми дефекти и тој може брзо да се поправи.
Тој нагласи дека дефектите во постројката за флотација не го попречуваат извлекувањето на рударите, бидејќи тие не се поврзани со лифтот што се користи за нивно изнесување од рудникот. Претседателот на синдикатот упати критики за недостигот на инвестиции и застареноста на опремата, истакнувајќи дека вакви инциденти се случувале и претходно.
„За жал, недостигот на инвестиции и застарените трафостаници често доведуваат до прекини во работата“, рече Јанузи.
Според него, отсуството на алтернативно напојување со електрична енергија доведува до тоа рударите да остануваат заробени со часови – ситуација што тој ја опиша како опасна по нивните животи и здравје.
Текстот (Видео) Започна операцијата за спасување на рударите од „Трепча“ е превземен од МАКФАКС.
