Денес во Русија започнаа тридневните парламентарни избори, каде што жителите на самопрогласените Донецк и Луганск, како и на Запорожските и Херсонските области, ќе гласаат за прв пат по приклучувањето кон Русија.
Гласањето ќе трае од 18 до 20 септември, а Централната изборна комисија (ЦИК) најави зголемени безбедносни мерки, вклучително и мерки за припадниците на војската, објави Спутник.
На изборите, низ цела Русија ќе бидат распределени вкупно 20.700 пратенички мандати и лидерски позиции, а меѓу набљудувачите ќе бидат претставници на 12 меѓународни организации од ЗНД, ОДКБ и БРИКС.
Рускиот претседател Владимир Путин пред гласањето оцени дека изборите се во голема мера одлучувачки и рече дека тие мора да се одржат во строга согласност со законот.
„Таква голема кампања се спроведува во услови на Специјална воена операција. Жителите на Донбас и Новорусија ќе избираат пратеници во Државната дума за прв пат по повторното обединување со Русија. Убеден сум дека нашите војници и офицери, кои сега извршуваат тешка борбена задача, ќе учествуваат најактивно во гласањето. Нивната храброст и лојалност кон татковината се пример за целата земја“, рече Путин.
Тој изрази верување дека изборите на граѓаните ќе го потврдат единството на народот и, како што изјави, бесмисленоста на обидите за поткопување на руската државност и општествено-политичкиот систем.
„Ве молам да го искористите вашето уставно право и да донесете промислена и одговорна одлука, така што резултатите од изборите ќе ја потврдат зрелоста и отпорноста на руското општество. Ова ќе биде наш заеднички одговор на оние кои сакаат да ја ослабат Русија, да го ограничат нејзиниот развој, да нè лишат од нашиот суверенитет и правото самостојно да ја одредуваме нашата судбина. Учеството на изборите е наш заеднички придонес кон победата на Русија“, рече Путин.
