Милијардерот Бил Гејтс призна дека можеби бил во друштво на жртвите на Џефри Епштајн, иако никогаш не бил сведок на неговите злосторства. Коосновачот на „Мајкрософт“ го изјави ова во своето сведочење пред американскиот конгресен комитет, чиј транскрипт беше објавен вчера, пишува CNN.
Во доброволно интервју на Капитол Хил претходно овој месец, Гејтс тврдеше дека неговата тригодишна врска со осудениот сексуален престапник била чисто професионална и дека никогаш не бил сведок или учествувал во какво било сексуално вознемирување.
Сепак, демократскиот претставник Роберт Гарсија истакна дека истрагата на комитетот покажала дека некои од вработените на Епштајн биле и негови жртви, поради што Гејтс не може да ја исклучи можноста дека бил близок со нив. „Точно“, одговори Гејтс, признавајќи дека видел некои од вработените на Епштајн на крајот од состанокот во авионот на Епштајн. „Можно е да бев во присуство на жртвите“, додаде тој.
Комисијата за надзор на Претставничкиот дом побара сведочење на Гејтс како дел од својата истрага откако објавувањето на дополнителни документи на Епштајн претходно оваа година покрена прашања за неговите врски со покојниот финансиер. Вчера, комисијата објави и транскрипт од сведочењето на долгогодишната помошничка на Епштајн, Лесли Гроф, која го опиша својот поранешен шеф како „мајстор манипулатор“ и тврдеше дека немала сознанија за неговите злосторства.
Во своето сведочење, Гејтс откри дека Епштајн се обидел да го уценува користејќи информации за неговиот приватен живот, вклучително и за неговото брачно неверство.
Тој се сети како, откако прекинале соработка во 2014 година, Епштајн му испратил е-пошта барајќи „надомест за трошоци“ за кои наводно платил во врска со жена со која Гејтс имал афера.
Гејст се запознал со Епштајн во 2011 година преку од еден од неговите најблиски соработници, Борис Николиќ, Хрват.
Истражителите го испрашувале за други можни афери за време на интервјуто, тврдејќи дека ова е важно за да се утврди дали Гејтс имал други врски со осудениот сексуален престапник, но Гејтс и неговиот правен тим се спротивставиле.
Борис Николиќ е лекар и инвеститор, моментално извршен директор на Биоматика. Претходно бил главен советник за наука и технологија на Бил Гејтс. Докторирал на Медицинскиот факултет на Универзитетот во Загреб и завршил постдокторска обука за трансплантациска имунологија на Харвард.
Во 2002 година, тој станал основач и директор на Лабораторијата за напредна имунологија во Општата болница во Масачусетс, една од најдобрите болници во светот. За време на неговата научна кариера, тој потпишал повеќе од 70 научни статии и патентни пријави, а неговите истражувачки интереси се фокусирале на имуногенетиката, автоимунитетот и истражувањето на матичните клетки.
Првата евидентирана комуникација меѓу него и Епштајн во досиејата датира од јануари 2010 година, само шест месеци откако Епштајн беше ослободен од затвор во Флорида, каде што отслужуваше казна за подведување малолетничка.
Гејтс рече дека кога го запознал Епштајн во 2011 година, бил свесен дека финансиерот имал „кривична пресуда од сексуална природа“, но сепак бил заинтересиран професионално да соработува со него бидејќи Епштајн тврдел дека може да собере милијарди долари за глобалното здравство.
Таа филантропска можност никогаш не се остварила, а Гејтс сега вели дека жали што не обрнал поголемо внимание на угледот на Епштајн. „Жалам што не го сфатив тоа посериозно“, сведочеше тој. Иако Епштајн се обидел да го покани на својот остров и на социјални настани, Гејтс тврди дека бил свесен дека пресудата на Епштајн значела дека не може да ја премине таа граница.
Тој додаде дека е „мистериозно“ за тоа како Епштајн го стекнал своето богатство, истакнувајќи дека станот на Епштајн во Њујорк бил еден од „најпространите“ домови на Менхетен што ги видел. Гејтс, исто така, рече дека доброволно соработувал со канцеларијата на главниот обвинител на Американските Девствени Острови, интервјуирајќи го и обезбедувајќи му одредени финансиски документи.
фото/Depositphotos
Текстот Бил Гејтс: Можно е да сум бил во друштво на жртвите на Епштајн е превземен од МАКФАКС.
