Министерката за надворешни работи на Бугарија Велислава Петрова ја отвори Годишната средба на Советот за регионална соработка (СРС), која се одржа денес во Софија, во рамките на бугарското претседателство со Процесот за соработка во Југоисточна Европа (ПСЈИЕ). Настанот се одржува во пресрет на средбата на министрите за надворешни работи и Самитот на ПСЈИЕ и е дел од одбележувањето на 30-годишнината од создавањето на Процесот, јавува Трибуна.
Во своето обраќање, министерката Петрова го истакна значењето на ПСЈИЕ како главна регионална платформа за дијалог, доверба и добрососедска соработка во Југоисточна Европа. Таа посочи дека во услови на зголемени геополитички и економски предизвици, регионалната соработка останува клучен инструмент за зајакнување на стабилноста, безбедноста и одржливиот развој.
Велислава Петрова нагласи дека Бугарија ги има сите предуслови да се позиционира како регионален центар на стабилност, економска конкурентност и технолошки развој, со клучна улога во областа на енергетиката, иновациите и дигиталната сфера.
„Во време на зголемени геополитички и економски предизвици, нашата земја го демонстрира потенцијалот да биде гарант на стабилност и предвидливост, придонесувајќи активно за одржливиот развој на регионот и Европа“, нагласи уште министерката за надворешни работи.
Во рамките на официјалното отворање на средбата, видеообраќање упати и европската комесарка за соседство и проширување Марта Кос. Во своето излагање, таа истакна дека во услови на зголемена геополитичка неизвесност, променлив баланс на силите и засилена конкуренција за влијание во регионите соседни на Европската Унија, политиката на проширување добива сè поголемо стратешко значење за безбедноста и стабилноста на Европа. Комесарката Кос ја нагласи потребата земјите од Западен Балкан трајно да бидат поврзани со Европската Унија и истакна дека во тој процес се бележи реален и опиплив напредок.
Во рамките на средбата, шефицата на бугарската дипломатија Велислава Петрова изрази благодарност до генералниот секретар на СРС, Амер Капетановиќ, и неговиот тим за активната работа во поддршка на регионалната соработка и европската перспектива на регионот.
