Aлбанскиoт тренер, Еркам Исмаили, забележа уште еден значаен чекор во својата професионална кариера, откако беше назначен за помошник-тренер на кошаркарската репрезентација на Северна Македонија до 16 години, јавува Алмакос.
Ова назначување доаѓа како резултат на континуираната работа, професионализмот и посветеноста што Исмаили ги покажуваше низ годините во развојот на кошарката, при што се смета за еден од најперспективните тренери од новата генерација во земјата. Потсетуваме дека претходно ја извршуваше функцијата помошник-тренер во КК Чаир, како и во Сигал Приштина, каде што стекна значајно искуство во работата со млади кошаркари и на натпреварувачко ниво.
За Исмаили, ангажманот во стручниот штаб на репрезентацијата до 16 години претставува признание за досегашната работа и нова можност да придонесе за развојот на младите кошаркарски таленти во земјата.
„Назначувањето за помошник-тренер во репрезентацијата го прифатив со голема одговорност. Тоа е резултат на досегашната работа и дополнителна мотивација да продолжам понатаму. На располагање имаме многу талентирани играчи, како од нашата лига, така и од странство. Со работа, дисциплина и тимска игра, нашите очекувања се да се бориме за пласман во Дивизијата А“, изјави Еркам Исмаили за весникот KOHA.
Значаен предизвик ја очекува репрезентацијата до 16 години ова лето. Репрезентацијата на Северна Македонија ќе учествува на Европското првенство У16, Дивизија Б, кое ќе се одржи од 6 до 15 август во Скопје и Гевгелија.
Во групната фаза, Северна Македонија ќе се соочи со Украина, Швајцарија, Хрватска, Исланд и Кипар, во исклучително конкурентна група, каде главната цел ќе биде борба за позитивни резултати и добро место на табелата.
