Денот на храброста и празникот на Бугарската армија – 6 мај, беше одбележан на бугарскиот воен меморијал во с. Ново Село, Република Северна Македонија. Настанот беше организиран заеднички од Амбасадата на Бугарија во Скопје, Министерството за одбрана на Бугарија и Фондацијата „Бугарска Памет“, јавува БТА, пренесува Трибуна.
Заупокојна служба одржаа струмичкиот митрополит Наум и архиерејскиот намесник во Петрич, Неврокопска епархија, Павел Милушев.
Почит на загинатите во Меѓусојузничката и Првата светска војна – 71 бугарски војник, чии коски се положени во гробиштата кај Ново Село, Струмичко, оддадоа амбасадорот на Бугарија во Северна Македонија Желјазко Радуков, генералниот конзул на земјата во Битола Николај Димитров, директорот на дирекцијата „Социјална политика и политика за воено-патриотско воспитување“ во Министерството за одбрана Људмил Михајлов, флотилен адмирал Галин Манев, заменик-командант на Здружената команда на вооружените сили, Радослав Симеонов, главен експерт во одделот „Социјални инвестиции и воено-историско наследство“ при истата дирекција, пратениците Елисавета Белобрадова и Михаил Михајлов, градоначалникот на Петрич Димитар Брчков, градоначалникот на Падеж Александар Стаменов, дипломати од мисиите на Бугарија во Северна Македонија, капетан I ранг Вʼлчо Атанасов, заменик-началник на Високото воено-морнаричко училиште „Никола Ј. Вапцаров“ – Варна, питомци од училиштето, дувачки оркестар и претставници на Националната гарда, членови на бугарски здруженија во Северна Македонија, адвокатски колегии од Пловдив и Хасково, како и ученици од училишта во Гоце Делчев, Петрич, Благоевград, с. Рибново, Јакоруда, Абланица, с. Вʼлкосел, с. Кочан, Слаштен, Белица, Дабница, Сатовча.
„На крајот на 19 и почетокот на 20 век, неколку генерации Бугари ги дале своите животи за создавањето, обединувањето и зачувувањето на Третата бугарска држава. Нашата денешна слобода, нашето членство во обединета Европа, нашата можност да одлучуваме за својата иднина, им ги должиме на нивната саможртва. На крвта пролеана од нашите мажи и солзите на нашите жени. И кога ќе ги читаме надгробните натписи ќе видиме дека војните од тој период биле национално дело во полн смисол на зборот“, рече во својот говор амбасадорот на Бугарија во Северна Македонија, Желјазко Радуков.
„Можеме само да ја замислиме цената што ја платиле загинатите војници. Таа саможртва, а уште повеќе болката на нивните блиски – мајки, деца – создава огромна обврска за денешната генерација бугарски граѓани. Обврска да направиме сè за доброто на нашата татковина и да ја оставиме на нашите деца во подобра состојба отколку што сме ја добиле од нашите предци. Од нас не се бара да ги оставиме коските на Добро Поле или на врвот Кајмакчалан, од нас се бара постепено и посветено да работиме во професиите што сме ги избрале. Од нас се бараат добронамерни и човечки односи со нашите сограѓани. Од нас се бара непомирливост кон криминалот и корупцијата, општествена активност во хуманитарни и родољубиви каузи. Тоа е најминорното што можеме да го направиме за следните генерации“, додаде тој.
„Ние сме тука за да им оддадеме почит на сите бугарски војници загинати во војните за национално обединување. По крајот на Првата светска војна, ова свето место, каде што почиваат посмртните останки на повеќе од 70 бугарски војници, останува надвор од границите на татковината, но не и надвор од границите на бугарската меморија. Да не заборавиме дека тука, во тишината на историјата, почиваат нашите херои и нивната судбина е дел од сложената бугарска историја“, се наведува во обраќањето на министерот за одбрана Атанас Запрјанов, прочитано од Људмил Михајлов.
Пратеничката Елисавета Белобрадова посочи дека во военото гробиште во Ново Село се собрани коските на Бугари од Мизија, Тракија и Македонија, а „паметта е она што нè води напред за да бидеме храбри и во идните денови“.
„Храброста не значи да не ти е страв, туку да почитуваш нешто поголемо од себе – татковината“, изјави таа пред присутните.
„Меморијата ќе биде жива кога ќе ја чуваме и ќе ја пренесуваме на следните генерации. Нема да дозволиме жртвата на војниците да биде заборавена. Време е со чест и достоинство да го исполниме и нашиот долг“, истакна градоначалникот на Петрич, Димитар Брчков.
Чествувањето е 20-то јубилејно откако меморијалот беше обновен во 2006 година со средства на д-р Милен Врабевски и оттогаш секоја година бугарски политичари, дипломати, претставници на Бугарската армија и стотици граѓани оддаваат почит на 71 бугарски војник загинати во војните за национално обединување.
Венци и цвеќиња пред споменикот во меморијалот беа положени во име на министерот за одбрана на Бугарија, амбасадорот на земјата во Република Северна Македонија, генералниот конзул во Битола, началникот на одбраната, началникот на ВВМУ „Никола Вапцаров“, воените аташеа акредитирани во Северна Македонија од Кина, Хрватска, Унгарија, Романија, Турција, Украина, Италија и САД, како и од присутните пратеници, градоначалници, бугарски здруженија во Северна Македонија, фондацијата „Бугарска Памет“, Милен Врабевски и претставници на училишта.
Меморијалот, каде што се положени посмртните останки на 71 бугарски војник, од кои 15 се родени во села и градови на денешна Република Северна Македонија, како и во Егејска Македонија, Западните покраини, Тракија, Добруџа и Косово, се наоѓа недалеку од Струмица и е еден од над 400-те бугарски воени споменици на територијата на земјата.
Галеријата можете да ја погледнете овде.
