Израелскиот министер за одбрана, Израел Кац, денес повторно се закани на Либан, овој пат со „оган што ќе ја изгори целата земја“, два дена откако премиерот нареди воена ескалација против Бејрут.
За време на состанокот со претставникот на ОН за Либан, Жанин Хенис-Пласхарт, Кац упати остри пораки.
„Лидерот на Хезболах, Наим Касем, си игра со оган, а тој оган ќе го изгори Хезболах и целиот Либан“, рече Кац, според соопштението од неговиот кабинет.
Израелскиот министер тврдеше дека либанската влада „продолжува да се крие“ под закрилата на Хезболах.
„Оган ќе избувне и ќе ги проголта кедрите на Либан“, предупреди Кац.
Кац додаде дека либанскиот претседател Џозеф Аун „се коцка со иднината на Либан“ и рече дека Израел нема да прифати ситуација во која прекин на огнот во Либан постои истовремено со продолжување на нападите врз израелските сили и северен Израел.
Министерот за одбрана рече дека тој и премиерот Нетанјаху ѝ наредиле на израелската војска да „одговори со разорен оган против Хезболах во случај на каква било штета, закана или кршење на израелскиот суверенитет“.
Од друга страна, либанскиот претседател Аун изјави рано утрово дека примирјето со Израел е „првиот и неопходен чекор“ за какви било понатамошни преговори со Тел Авив. Тој нагласи дека овој став веќе им е пренесен на Соединетите Американски Држави, кои посредуваат во преговорите.
Во саботата, Нетанјаху ѝ нареди на војската да ги засили нападите врз Либан како одговор на нападите на Хезболах. Десетдневно примирје беше прогласено меѓу Либан и Израел на 17 април, но Тел Авив постојано го прекршува. Американскиот претседател Доналд Трамп објави во четвртокот дека Либан и Израел се согласиле да го продолжат примирјето за три недели, по втората рунда разговори во Вашингтон.
Хезболах, пак, изврши серија напади со беспилотни летала врз израелски војници во јужен Либан и северен Израел, наведувајќи ги повторените израелски прекршувања на прекинот на огнот.
Според официјалните либански бројки, израелските напади низ Либан од 2 март убиле повеќе од 2.500 луѓе, раниле повеќе од 7.750 и раселиле повеќе од 1,6 милиони.
фото/Depositphotos
Текстот Израелскиот министер за одбрана се закани на Либан: „Оган ќе ја изгори целата земја“ е превземен од МАКФАКС.
