Многу луѓе денес користат витамини за различни намени, но лекарите предупредуваат дека тие се контрапродуктивни во некои случаи.
Денес, се чини дека постои витамин за речиси секој проблем. Иако витамините не се ништо ново, социјалните мрежи често ги претставуваат како брзи и универзални решенија – од детоксикација до хормонални проблеми. Сепак, лекарите предупредуваат дека тоа не е секогаш безопасно.
Витамините не се корисни за секого само затоа што се достапни без рецепт, вели гастроентерологот и хепатолог д-р Јен Батисти за Parade. Нејзиниот колега, д-р Шалом З. Фрајгер, додава:
„Витамините не се строго регулирани како лековите, па затоа нивната чистота и состав не се секогаш сигурни.“
Токму затоа некои од нив можат сериозно да влијаат на здравјето на црниот дроб. Тие издвоија два додатоци кои можат да му наштетат на црниот дроб во поголеми количини.
Витамин А
Лекарите предупредуваат дека прекумерниот внес на витамин А може да го оптовари црниот дроб.
„Прекумерните количини на витамин А можат да се складираат во црниот дроб и да ги нарушат неговите нормални функции“, објаснува д-р Батисти.
Црниот дроб има клучна улога во филтрирањето на токсините, метаболизмот и создавањето важни супстанции за телото, па затоа е чувствителен на овие видови оптоварувања.
Иако витаминот А игра важна улога во здравјето на видот, имунолошкиот систем и кожата, неговиот вишок може да предизвика сериозни проблеми.
„Премногу витамин А може да доведе до оштетување на црниот дроб, воспаление, па дури и цироза“, предупредува д-р Фрајгер.
Затоа лекарите советуваат овој витамин првенствено да се внесува преку храна, како што се моркови, јајца, лосос и лиснат зеленчук.
Железо
Железото е важно за формирање на крв и правилно функционирање на телото, но во поголеми количини може да стане штетно.
„Железото се складира во црниот дроб, а неговиот вишок може да предизвика оштетување на клетките“, објаснува д-р Руча Шах, гастроентеролог и хепатолог. Иако често се зборува за недостаток на железо, неговиот вишок може да остане незабележан.
Прекумерните количини на железо можат да го поттикнат формирањето на лузни во црниот дроб и да ја нарушат неговата функција на долг рок.
„Токсичноста на железото може да доведе до оштетување на ткивото на црниот дроб и лузни“, предупредува д-р Шах.
Лекарите нагласуваат дека повеќето луѓе можат да внесат доволно железо преку исхраната, без додатоци во исхраната.
Како да се заштити здравјето на црниот дроб?
* Одржувајте балансирана исхрана со помалку преработена храна, шеќер и заситени масти
* Избегнувајте алкохол, кој може да ги оштети клетките на црниот дроб
* Пијте доволно вода за црниот дроб да може правилно да функционира
* Вежбајте редовно и одржувајте здрава тежина
* Земајте додатоци само по препорака на лекар
Текстот Лекарите предупредуваат: Популарните витамини можат да го оштетат црниот дроб е превземен од МАКФАКС.
